Medio Rural
  • Nova
 

Feijóo renova o compromiso cun rural con máis innovación, máis benestar e máis oportunidades e que siga apostando pola remuda xeracional

Apela a unha dobre implicación para seguir modernizando o rural: un cambio de mentalidade social e un compromiso dos poderes públicos

Destaca proxectos como o Plan específico para fixar poboación no agro, dotado con 230 millóns; a iniciativa impostos cero no rural; e o apoio a novas actividades non agrarias ou a proxectos de transformación industrial

Recorda que o Plan de desenvolvemento rural pon de manifesto que cada vez máis mozos teñen interese por incorporarse ao medio rural: máis de 1100 mozos incorporáronse ao agro nos anos 2016 e 2017

Salienta que os galardoados cos premios Agader mostran que é posible modernizar o medio rural con proxectos innovadores, xerando emprego e riqueza
 

O titular da Xunta presidiu este mediodía a entrega dos premios Agader 2018

Santiago de Compostela, 14 de setembro de 2018.- O presidente do Goberno galego, Alberto Núñez Feijóo, renovou hoxe o compromiso cun rural con máis innovación, máis tecnoloxía, máis cooperación, máis benestar social e con máis oportunidades; e que siga apostando pola remuda xeracional e que lle dea o protagonismo que lle corresponde á muller.

Durante o acto de entrega dos premios Agader 2018, Feijóo lembrou que o rural leva modernizándose desde hai tempo grazas, en parte, a unha dobre implicación que o fixo posible: un cambio de mentalidade social e tamén un compromiso dos poderes públicos. “E cómpre que ambas as dúas cousas se preserven se incrementen”, dixo, co fin de que o rural siga a ser unha opción de futuro.

Nesta liña, subliñou a posta en marcha por parte da Administración autonómica dunha batería de medidas que proban a aposta ambiciosa da Xunta polo rural dos últimos anos, entre as que destacou: as axudas a mozos para novas actividades non agrarias ou para grandes proxectos de transformación industrial; a aprobación dos adiantos da PAC; o plan específico para fixar poboación no agro, dotado con 230 millóns de euros e que recolle 23 medidas diferentes; a iniciativa impostos cero no rural, para comprar ou permutar predios ou para que un mozo merque unha vivenda; a revisión do plan forestal, co obxectivo de permitir unha mellor posta en valor dos montes; ou as axudas aos concellos que garantan a limpeza dos montes.

Así mesmo, resaltou a aprobación do Plan básico autonómico, presentado hai unhas semanas para facer de Galicia un territorio mellor ordenado e que contribúa a un maior desenvolvemento.

O titular da Xunta recordou ademais que o Plan de desenvolvemento rural pon de manifesto que cada vez máis mozas e mozos teñen interese por incorporarse ao medio rural. Non en van, a través das axudas desta iniciativa máis de 1100 mozos incorporáronse ao agro nos anos 2016 e 2017, o que significa que en só dous anos, conseguiuse o 50% do obxectivo marcado para 2023.

“Vivir no rural, vivir do rural xa non é dar un paso atrás. É un gran proxecto e un gran paso adiante”, aseverou, referíndose, a modo de exemplo, á aposta pola tecnoloxía de Trasdeza Natur, para transformar os produtos da horta ecolóxica a través de técnicas como o deshidratado solar; ao proxecto de Cristina Bañobre Lomba para arrendar e recuperar máis de 30 hectáreas para a produción hortícola; á incorporación da innovación ao mundo do viño feita por Levinred, unha cooperativa cosmética aberta ao mercado nacional e internacional; aos produtos delicatessen de Veigas de Sabugueiro; ou a aposta de Turisa Galicia polo turismo responsable, de excelencia e de calidade na Ribeira Sacra.

Ao longo do acto, o presidente da Xunta salientou tamén o Festival da Luz, que demostra que un pequeno concello como Boimorto pode ser o centro da música e da cultura en Galicia durante unha fin de semana; e a Asociación de Familiares de Enfermos de Alzhéimer en Ourense, “un exemplo de que as necesidades sociais non entenden de territorios, senón de persoas, e a todas hai que apoiar e atender axeitadamente”.

“E Cooperativas lácteas unidas CLUN foi tamén un paso adiante. Foino polo mero feito de unir miles de socios en lugar de dividilos e pola dignificación da muller no ámbito rural, para que deixe de estar dobremente discriminada por ser muller e selo no rural”, dixo, incidindo en que os oito premios Agader deste ano mostran que é posible modernizar con proxectos innovadores o medio rural, xerando emprego e riqueza.
 


Galería de imaxes

O titular da Xunta presidiu este mediodía a entrega dos premios Agader 2018O titular da Xunta presidiu este mediodía a entrega dos premios Agader 2018O titular da Xunta presidiu este mediodía a entrega dos premios Agader 2018O titular da Xunta presidiu este mediodía a entrega dos premios Agader 2018O titular da Xunta presidiu este mediodía a entrega dos premios Agader 2018O titular da Xunta presidiu este mediodía a entrega dos premios Agader 2018O titular da Xunta presidiu este mediodía a entrega dos premios Agader 2018O titular da Xunta presidiu este mediodía a entrega dos premios Agader 2018O titular da Xunta presidiu este mediodía a entrega dos premios Agader 2018O titular da Xunta presidiu este mediodía a entrega dos premios Agader 2018

 

Recursos



© Copyright. Consellería do Medio Rural. Xunta de Galicia. Todos os dereitos reservados. Aviso Legal    Atendémolo/a
RSS